Nota: O documento orixinal é máis recente que esta tradución.

Debian 7 -- Fe de erratas

Problemas de seguridade

O equipo de seguridade de Debian realiza actualizacións dos paquetes na versión estábel nos que identificou problemas relacionados coa seguridade. Consulte as páxinas de seguridade para obter máis información sobre calquera problema deste tipo atopado en «Wheezy».

Se usa APT, engada a seguinte liña ao ficheiro /etc/apt/sources.list para acceder ás últimas actualizacións de seguridade:

  deb http://security.debian.org/ wheezy/updates main contrib non-free

Despois execute apt-get update seguido de apt-get upgrade.

Versións menores

Ás veces, en caso de haber varios problemas críticos ou actualizacións de seguridade, actualízase a distribución publicada. En xeral, referímonos a estas actualizacións como versións menores.

Consulte o rexistro de cambios para obter detalles sobre as modificacións entre as versións 7.0 e 7.5.

As correccións sobre a distribución estábel publicada pasan a miúdo por un período de probas extenso antes de ser aceptadas no arquivo. Non obstante, estas correccións están dispoñíbeis no cartafol dists/wheezy-proposed-updates de calquera réplica do arquivo de Debian.

Se usa APT para actualizar os paquetes, pode instalar as actualizacións propostas engadindo a seguinte liña ao ficheiro /etc/apt/sources.list:

  # propostas para unha versión menor da 7
  deb http://ftp.us.debian.org/debian wheezy-proposed-updates main contrib non-free

Despois execute apt-get update seguido de apt-get upgrade.

Sistema de instalación

Para obter información sobre erratas e actualizacións do sistema de instalación consulte a páxina de información sobre a instalación.